Tilkynning frá Vinnumálastofnun

Þegar þú ert boðaður/boðuð á kynningarfund um ÞOR. verkefnið (átak fyrir langtíma atvinnuleitendur þ.e. 12 mánuði á bótum eða lengur og 30 ára og eldri) þá segir svo í tölvupóstinum og sms-inu sem þú færð:

Góðan dag, Þú ert boðaður/uð á fund hjá VMST þann 18.08 kl. 09:00 að Engjateig 9 kjallara, (í verkfræðingahúsinu). Skyldumæting. Hlökkum til að sjá þig :)

Kynningin tekur um 45 min. og síðan flettir þú möppu með stuttum lýsingum á þeim virkniúrræðum sem eru í boði. Þú merkir við þrennt á þartilgerðu eyðublaði. Þér er svo úthlutað eitt af þessu þrennu og það tilkynnt með tölvupósti og sms.

Amen

Er ÞOR. átaksverkefni VMST. fjölmiðlasirkus?

Margumtalað átaksverkefni Vinnumálastofnunar ÞOR.:

• Kynnt sem 70 úrræði, þú mátt velja 3 en verður bara úthlutað eitt, en áður ertu flokkaður.
• Hvenær jú þegar þú verður boðaður á 40 - 60 manna kynningarfund þar sem er skyldumæting.
• Markhópurinn er um 4.000 langtíma atvinnuleitendur (atvinnulaus lengur en 12 mánuði og 30 ára eða eldri) þ.e. 67 til 100 kynningafundir fram að 1. nóv..

Er þetta fjölmiðlasirkus eða hvað?

Ég bíð alla vega spenntur eftir því að verða boðaður, þar sem ég mæti auðvitað af skyldurækni. Hlakka til að sjá hver þessi 70 úrræði eru (nei fyrirgefið það verður búið að ákveða fyrir mig fyrirfram hvaða úrræði ég fæ að sjá) og mun velja þegar búið er að flokka mig það sem mér finnst geta gagnast mér best í atvinnuleitinni. Já ég má velja 3 úrræði af flokkunarlistanum en svo ræður lukkan því hverju mér verður úthlutað fyrir náð og miskunn. En hvenær, eftir hvaða kerfi er boðað? Er það stafrófsröð eða einhver önnur flokkun?

Ég held ég verði að fara í heimsókn til Vinnumálastofnunar við Engjateig til að afla mér frekari upplýsinga, því ekkert þýðir að hringja. Ég hef ekki þolinmæði til að bíða eftir tölvupósti og sms. frá Vinnumálastofnun sem kannski berst ekki fyrr en einhverntíman í október. Ætli það sé hægt að troða sér framar í röðina? Ég er jú virkur atvinnuleitandi, nú skal sýna það í verki.

Nánar síðar!

ÞOR. átaksverkefni Vinnumálastofnunar

1. ágúst hleypti Vinnumálastofnun af stað sérstöku átaki gegn afleiðingum langtímaatvinnuleysis undir yfirskriftinni ÞOR - þekking og reynsla. Markmiðið með átakinu er að virkja þann hóp einstaklinga sem hafa verið á atvinnuleysisbótum í tólf mánuði eða lengur til þátttöku í fjölbreytilegum vinnumarkaðsúrræðum.

Á næstu mánuðum verða allir þessir einstaklingar kallaðir til ráðgjafafundar á vegum Vinnumálastofnunar og þeim kynntir með öflugum og markvissum hætti tækifæri og skyldur þeirra til þátttöku úrræðum sem eiga að auka möguleika þeirra í atvinnuleitinni. Um 4000 manns hafa nú verið atvinnulausir í eitt ár eða lengur og Vinnumálastofnun hefur sett sér það markmið að nálgast þá alla fyrir 1. nóvember nk.

Leitað hefur verið samstarfs við fjölda fræðsluaðila, fyrirtækja, stofnana og félagasamtaka um virkniúrræði og þá hefur stofnunin átt samræðu við símenntunardeildir háskólanna en kraftar þeirra hafa til þessa lítið verið nýttir atvinnuleitendum til hagsbóta. Um 70 úrræði standa atvinnulausum nú til boða, mismunandi eftir menntun og starfsreynslu hvers og eins.

Reynslan og skipulag verkefnisins Ungt fólk til athafna (UFTA) verður nýtt í ÞOR-verkefninu. Árangurinn af UFTA-verkefninu er sá að búið er að virkja 90% af hópi atvinnuleitenda á aldrinum 16 - 25 ára, sem voru rúmlega 3.000 þegar átakið var sett af stað 1. febrúar sl. UFTA-verkefnið hefur nú bætt við sig hópnum á aldinum 25 - 29 ára en ÞOR-verkefnið mun sinna hópnum frá 29 til 70 ára.

Aðsetur ÞOR átaksins er að Engjateig 9 (við hlið skrifstofu Vinnumálastofnunar á Engjateig 11)

ÞOR ferlið

Einstaklingar eru kallaðir inn á fund í 40 - 60 manna hópum, en fundarboð berst til viðkomandi með tölvupósti og sms.

Athugið að skyldumæting er á boðaða fundi og þeir sem ekki mæta fá send bréf um afskráningu af atvinnuleysisbótum.

Ef viðkomandi er enn í virkri atvinnuleit þarf að hafa samband innan ákveðinna tímamarka og gera grein fyrir fjarveru.

Á ÞOR kynningarfundum eru úrræði í boði kynnt, með mismunandi áherslum út frá hópum.

Einstaklingar fá í hendur valblað og merkja við þrjú úrræði sem höfða mest til þeirra, en einungis eitt úrræði er í boði fyrir hvern.

Úrræðin/Námskeið hefjast á haustmánuðum og eru einstaklingar látnir vita með sms og tölvupósti hvenær valið námskeið hefst.

Að námskeiði loknu eru einstaklingar kallaðir til viðtals, þar sem þeim er fylgt eftir og hvattir til áframhaldandi virkni og atvinnuleitar.

Kenna atvinnuleitendum að nýta sér Facebook

Ég sendi eftirfarandi erindi til Vinnumálastofnunar í samstarfi við Tölvuskóla Íslands vegna átaksins ÞOR. fyrir þá sem eru búnir að vera á atvinnuleysisbótum lengur en í 12 mánuði:

Námskeið / aðstoð fyrir atvinnuleitendur í Facebook

Ég „Sveinbjörn Fjölnir Pétursson“ hef aðstoðað atvinnuleitendur við Facebook bæði í Rauðakrosshúsinu og eins í Hlutverkasetrinu. Í þessu sjálfboðna starfi hef ég komist að því hvað Facebook er frábært tæki fyrir atvinnuleitendur til að koma sér á framfæri og jafnframt hvað það er lítið og illa nýtt í þeim tilgangi.

Hvernig getur atvinnuleitandi nýtt sér Facebook:

• Öflugt tæki til að stækka og viðhalda sínu tengslaneti.
• Auðveldar fólki að fylgjast með og koma sér á framfæri.
• Heldur fólki virku.
• Rýfur félagslega einangrun og hvetur mann til að fara út á meðal fólks.
• Hjálpar manni að vera virkur þáttakandi í hópastarfi, samanber Atvinnuleysi nei takk hópinn sem var stofnaður á Facebook og hefur haldið 18 fundi frá hruni.
• Frábært tæki til að markaðssetja sjálfan sig og sín áhugamál.
• Fyrirtæki fara að gera kröfu um að starfsfólk sitt hafi þekkingu á Facebook.
• Frábært tæki sem hver einstaklingur getur notað eins og honum nýtist best.
• Eflir samskipti við ættingja og samfélagið í heild.

Vinnumálastofnun bjóði atvinnuleitendum þessi námskeið:

1. Er ekki á Facebook, en vil nýta mér verkfærið.
2. Er á Facebook, en þarf aðstoð til að nýta mér verkfærið sem best.
3. Er með mína eigin fartölvu og ætla að nýta Facebook til að auka mína atvinnumöguleika.

Fyrirkomulag kennslu:

1. Þrjár kennslustundir (40 mín.) tvo daga í röð. (Koma sér í gang).
2. Viku seinna þrjár kennslustundir á einum degi. (Er eitthvað sem þú skilur ekki og stoppar við. Mættu með spurningalista og við finnum svarið).
3. Þremur vikum seinna þrjár kennslustundir á einum degi. (Eftirfylgni, hvernig hefur gengið. Reynslusögur og lærum hvert af öðru).

Samtals 12 kennslustundir.


Leiðbeinandi:

Sveinbjörn Fjölnir Pétursson sem hefur verið virkur atvinnuleitandi og þekkir vel aðstæður atvinnuleitenda. Hann hefur nýtt sér Facebook í sinni atvinnuleit og leiðbeint atvinnuleitendum með góðum árangri.

Eftirfarandi svar var að berast:

Sæll Sveinbjörn,

Takk fyrir að sýna ÞOR átakinu áhuga og kynna fyrir okkur starf þitt.
Því miður höfum við gert samninga um nægilega mörg úrræði, ásamt því að við höfum verið að horfa til lengri námskeiða

Við vitum af þér ef farið verður aftur í sambærilegt átak.

Bestu kveðjur,
xxxxxxxxxx xxxxxxxxx

Hvað á maður að segja? Best að segja sem minnst.

Býflugur, vinnum saman - ný viðhorf.

Býflugur er sjálfsprottinn hópur atvinnuleitenda sem hefur að markmiði að virkja aðra atvinnuleitendur til góðra verka fyrir sig sjálfa og samfélagið.

Hópurinn hefur átt tvo fundi með starfsmönnum Vinnumálastofnunar til að kanna hvort við sem notendur þjónustunnar getum orðið að liði til að styrkja stöðu atvinnuleitenda sem einstaklinga og samfélagið þar með.

Fyrri fundurinn var 10. júní sl. á honum voru Helga G. Halldórsdóttir frá Rauða krossinum og starfsmenn Vinnumálastofnunar þau Hugrún Jóhannesdóttir og Jakob Þór Einarsson. Í hópi býflugna voru þau Ármann Jóhannesson, Ásgeir M. Rudolfsson, Björg Ólafsdóttir, Margrét Thorsteinsson og Sveinbjörn Fjölnir Pétursson. Eftir fundinn var ákveðið að hittast aftur í ágúst.

Síðari fundurinn var 29. júní sl. á honum voru Gissur Pétursson og Guðlaug Hrönn Pétursdóttir starfsmenn Vinnumálastofnunar. Í hópi býflugna voru þau Ásgeir M Rudolfsson, Björg Ólafsdóttir, Davor Purusic, Margrét Thorsteinsson og Sveinbjörn Fjölnir Pétursson.

Í kjölfar þessa funda atvinnuleitenda og starfsmanna Vinnumálastofnunar var ákveðið að halda áfram að móta tillögur að verkefnum og hafa fleiri komið að því en þeir sem mættu á ofangreinda fundi. Tilbúin eru drög að 5 samstarfsverkefnum og 2 tillögur.

Fyrir hönd Býflugna og með bestu kveðju

Margrét Thorsteinsson

Sagan um snjóflóðið mikla

Birti þessa smásögu hér eftir Júlíus Valdimarsson þar sem mér finnst samlíkingin við atvinnuleysið svo góð.

Snjóflóðið mikla

Í októbermánuði 2008 hófst snjóflóð á Íslandi sem til þessa hefur grafið undir sér meira en fimmtán þúsund einstaklinga. Talið er að meðal þeirra sem grafnir eru undir snjófergjunni séu stórir hópar ungs fólks. Til þessa hafa aðeins innan við 1000 manns fundist. Það háir nokkuð allri leit að mikil leynd hvílir yfir því hverjir grafnir eru í snjóflóðinu. Litlar rannsóknir hafa verið gerðar á ástæðum þessarar leyndar. Þó verður ráðið af frásögnum þeirra sem bjargað hefur verið að eitt af einkennum þess að vera grafinn í snjóflóðinu sé mikill ótti við að verða fundinn, því að af einhverjum óútskýrðum ástæðum þyki hinum grafna mikil smán að því að hafa orðið fyrir flóðinu. Einnig hafa þeir sem komist hafa af til þessa lýst því að þeir hafi jafnvel mætt sama viðhorfi hjá þeim sem ekki urðu undir í þessum miklu náttúruhamförum. Engar rannsóknir hafa enn verið gerðar á þessu undarlega og þverstæðukennda fyrirbrigði. Þó er talið að ástæður geti verið (ó)menningarlegar og jafnvel byggðar á misskilningi eða fordómum.

Mikill viðbúnaður er til þess að taka á móti þeim sem finnast en leitarflokkar eru fáir og eru þeir illa búnir tækjum. Allar móttöku- og endurhæfingarstöðvar standa meira og minna tómar þar sem mjög fáir af fórnarlömbum snjóflóðsins koma þangað til að taka þátt í aðhlynningar- og endurhæfingarstarfi. Nokkrar áhyggjur eru af þessu ástandi, einkum vegna þess að lítið er vitað um afdrif þeirra sem orðið hafa undir í flóðinu. Þó hafa rannsóknir og reynsla af hliðstæðum atburðum áður í sögunni hér á landi og í öðrum löndum sýnt að margir sem lenda í aðstæðum sem þessum verða aldrei samir menn, sérstaklega ef þeir eru grafnir undir fönn í langan tíma. Einkum er þetta afdrifaríkt þegar um er að ræða ungt fólk sem er á þeim stað í lífinu að þurfa að læra og þjálfast í að taka þátt í samfélaginu með virkum og skapandi hætti til góðs fyrir sig og samfélagið. Séð er fram á mögulegar neikvæðar afleiðingar þessa varðandi framtíð þessa lands. Vitað er að fjölmargir sem lenda í ástandi sem þessu komast aldrei aftur til fullrar heilsu og enda sem öryrkjar og ótalinn er sá fjöldi fólks sem tekur sitt eigið líf í tengslum við þessar aðstæður.

Þetta ástand hefur nú varað í hátt á annað ár og vekur nokkra undrun hve hægt gengur við björgunarstörfin. Stingur þetta í stúf við önnur tilfelli um snjóflóð, eldgos, jarðskjálfta eða aðrar þekktar náttúruhamfarir á Íslandi. Í þessum tilfellum hefur þjóðin öll lagst á eitt um björgun fórnarlambanna, björgunarsveitir og sjálfboðaliðar um allt land hafa ekki unað sér
hvíldar þar til öllum hefur verið bjargað. Eftirminnileg dæmi eru gosið í Vestmannaeyjum, snjóflóðin í Súðavík, Suðurlandsskjálftinn og jafnvel nú í sambandi við gosið í Eyjafjallajökli þar sem björgunarsveitir, sjálfsprottnar sveitir sjálfboðaliða, fjölmiðlar, samtök og opinberir aðilar vinna ötult hjálparstarf.

Viljum við kalla til þennan dýrmæta samhug Íslendinga nú í þessum miklu hörmungum sem yfir okkur dynja? Ef við leggjumst öll á eitt mun okkur takast að bjarga öllum þeim sem liggja undir fargi flóðsins.

Höfundur: Júlíus Valdimarsson hjá Lausnum

Nei því miður.

Það eru margir atvinnuleitendur sem fá oft svona póst eða svipaðan sem svar við atvinnuumsókn. Það eru nefnilega 9 og upp í nokkur hundruð sem sækja um hvert auglýst starf, en bara einn er ráðinn:

Ágæti umsækjandi

Þakka þér kærlega áhugann á að starfa með okkur hjá xxxxxxx.

Við biðjumst velvirðingar á þeim töfum sem hafa orðið á málinu en fjölmargar umsóknir bárust í starfið sem þú sóttir um og var okkur vandi á höndum að velja úr hópi hæfra umsækjenda.

Við höfum nú hafið viðtöl við nokkra af umsækjendum og þykir okkur leitt að láta vita að við munum ekki geta boðið þér starf að þessu sinni.

Við vonum að þú hafir okkur í huga og haldir áfram að sækja um störf hjá fyrirtækinu sem vekja áhuga þinn.

Með vinsemd og virðingu,

Starfsmannahald xxxxxxx

Það er virðingarvert að fá svar. Staðreyndin er samt sú að það eru mörg fyrirtæki sem ekki hafa fyrir því að svara. Það finnst mér vera dónaskapur.