Nýr kjarasamningur bótaþega?

Nýr kjarasamningur ASÍ. og SA. hefur verið undirritaður. Þar koma fyrir þrjár klausur sem tengjast atvinnuleitendum og öðrum bótaþegum:

Frá ríkisstjórn vegna kjarasamnings:

• Stjórnvöld skuldbinda sig til að vinna með aðilum vinnumarkaðarins að endurskoðun laga um atvinnuleysistryggingar og vinnumarkaðsaðgerðir. Ráðist verður í sérstakt tilraunaverkefni þar sem stéttarfélögin verða helstu veitendur þjónustunnar. Markmiðið er að bæta þjónustu við atvinnuleitendur hvað varðar skráningu, vinnumiðlun og vinnumarkaðsúrræði.

Úr nýjum kjarasamningi:

• Atvinnuleysisbætur og bætur almannatrygginga fá hliðstæða hækkun og þeir sem eru á lægstu töxtum.

• Átak verður sett af stað í þjónustu við atvinnuleitendur á vegum stéttarfélaganna og menntunarúrræði verða sett á oddinn bæði fyrir yngra fólk og þá sem komnir eru af skólaaldri.

Fundur með Guðbjarti Hannessyni velferðarráðherra

Fulltrúi facebook hópsins Atvinnuleysi nei takk Sveinbjörn Fjölnir Pétursson og tveir fulltrúar Býflugnanna (Vinnum saman - Ný viðhorf) þær Björg Ólafsdóttir og Margrét Thorsteinsson fóru á fund velferðarráðherra Guðbjarts Hannessonar og hans fólks ásamt stjórnarformanni Vinnumálastofnunar Runólfi Ágústssyni.

Björg Ólafsdóttir og Margrét Thorsteinsson tóku saman eftirfarandi skjal með tillögum til úrbóta í málefnum atvinnuleitenda. Þetta skjal var lagt fram á fundinum og rætt ítarlega í rúma klukkustund.

Við þökkum góðan fund.

Fundur atvinnuleitenda, stjórnarformanns Vinnumálastofnunar og velferðarráðherra 2. febrúar 2011.

Ítarlegur listi yfir tillögur atvinnuleitenda

hugmyndir að lausnum og leiðum.

Réttarstaða:

1. Atvinnuleitendur eru teknir af bótum og síðan spurðir nánar. Atvinnuleysisbætur eru svo lágar að endar ná oft ekki saman og því skiptir tími leiðréttinga miklu máli.

Hugmynd að lausn: Að atvinnuleitandi sé ekki tekinn af bótum fyrr en við lokaúrskurð og að refsingin sé að fara úr 100% í 75% bætur í 2 mánuði, þ.e. skerðing um fjórðung. Í núverandi árferði dregur fólk varla fram lífið á svona lágum bótum. Því er það of hörð refsing að taka fólk af bótum í tvo mánuði og getur jafnvel leitt til heimlismissis í sumum tilfellum.

2. Veikindarétt eins og hjá öðrum borgurum.

Hugmynd: Að fá 1 dag í veikindarétt fyrir hvern mánuð á atvinnuleysisbótum, það er 50% af því sem launafólk fær.

3. Réttur til háskólanáms var skertur í janúar 2010. Einingafjöldi fór úr 12 ECTS í 10 ECTS einingar (4 einingar nýtast ekki ef eitt fag er 6 einingar).

Athugasemd: Einkennileg ákvörðun að skerða þessa heimild á krepputíma. Menntun og nýsköpun leiðir af sér atvinnusköpun eins og læra má af sögu þeirra þjóða, sem farið hafa þá leið.

4. Umboðsmenn atvinnuleitenda.

Hugmynd: Tvö ráðin í vinnumarkaðsúrræði í mesta lagi eitt ár, en annar af þeim sem fyrst er ráðin verði í eitt og hálft ár til að viðhalda þekkingu innan starfsins. Síðan líða 6 mánuðir á milli þess að nýr atvinnuleitandi tekur við af þeim sem hefur verið lengur í starfi.

5. Lengja tímabil atvinnuleysisbótaréttar í 5 ár.

Athugasemd: Einnig sjá til þess að þeir sem hafa dottið út af bótum nýlega fari aftur á bætur ef þeir hafa ekki verið atvinnulausir lengur en 5 ár.

6. Úrræði og stuðning fyrir fólk sem dettur út af bótum þar til það kemst í önnur úrræði. Við getum ekki látið fólk falla á milli í kerfinu. (Kunningi okkar lenti í þessu, einstæður með tvö börn í jólamánuðinum 2010).
7. Útreikningur á raunhæfu lágmarks framfærsluviðmiði verði gerður opinber svo fljótt sem auðið er.
8. Að detta af bótum eða fara í tímabundna vinnu (stundum jafnvel í tvo daga) verði ekki þannig að einstaklingur þurfi að vinna upp rétt aftur t.d. á afsláttarkorti vegna lækniskostnaðar og desemberuppbótar.

Hugmynd að lausn 1: Ef einstaklingur kemur inn á atvinnuleysisbætur aftur innan 6 mánaða skerðast þessi réttindi ekki.

Hugmynd að lausn 2: Ef atvinnuleitandi hefur verið atvinnulaus í 6 mánuði á síðustu 12 mánuðum og er þessa stundina atvinnulaus þá á hann rétt á þessu.

9. Ekki skerða bótatímbil á meðan atvinnuleitandi er t.a.m. í vinnumarkaðsúrræði.
10. Rétt á orlofi.

Hugmynd: Að atvinnuleitendur fái a.m.k. 12 daga á ári, sem er 50% af því sem launamaður fær.

11. Fá tvo áheyrnafulltrúa með tillögurétt og málfrelsi í stjórn Vinnumálastofnunar.

Hugmynd: Aðilar innan Rauða krossins eru tilbúnir til að vera atvinnuleitendum innan handar t.a.m. við val á áheyrnafulltrúum.

Atvinnutilboð

12. Heilsa og heilsa er ekki það sama. Öll vinna hentar ekki öllum. Ekki megi þvinga atvinnuleitenda í hvaða starf sem er í boði, þarf að vera sambærilegt við það sem hann hefur áður unnið við eða hefur hæfileika og getu til. Þannig að einstaklingurinn henti í starfið og starfið henti einstaklingnum.

Hugmynd að lausn: Mikilvægt er að hægt sé að ræða málin án þess að atvinnuleitandi eigi á hættu að vera tekinn af bótum.

Virkni- og vinnumarkaðsúrræði:

13. Að virkniúrræði verði hnitmiðaðri og meira í samstarfi við notandann.

Hugmynd að lausn: Úrræði ýmis konar þarf að hugsa í gegn og fjármagna eins og t.a.m. 856 ný störf árið 2010 og ábyrgðin þarf að vera skýr og vanda þarf til verka. 856 störf er dæmi um frábært verkefni. Slíkt verkefni má fjölfalda, en vanda aðeins betur til verka. (Dæmi voru um að atvinnuleitendur voru ráðnir inní störf á ákveðnum mánaðarlaunum, sem síðar voru lækkuð um 50 þúsund krónur. Launin voru þá komin undir lægsta taxta VR).

14. Auka við úrræði fyrir atvinnuleitendur.

Hugmynd 1: Skiptimarkaður við vinnandi verði heimilaður sem vinnumarkaðsúrræði. Þeir sem eru vinnandi hleypi atvinnuleitenda í sitt starf. Þetta minnkar líkurnar á örorku langtímaatvinnuleitenda og gefur vinnandi fólki kost á að fara í endurmenntun eða sem úrræði gegn starfskulnun. Þetta dreifir áfalli kreppunnar á fleiri herðar og minnkar þannig skaðan á mannauðinum. Þetta getur verið öflugt tímabundið verkefni þar sem ekki þarf að fylgja því fjármagnskostnaður því sá vinnandi færi á atvinnuleysisbætur á meðan atvinnuleitandinn er á sömu launum og sá sem hann skipir við.

Hugmynd 2: Ríkið búi til störf sem langtímaatvinnuleitendur skiptist á að vinna 6 mánuði í senn. Þessi störf geta falið í sér ýmislegt sem miðar að því að efla nýsköpun, auka hráefnisnýtingu, efla markaðssetningu á íslenskum vörum, finna leiðir til að spara gjaldeyri og fleira sem stuðlar að því að Ísland komist sem fyrst uppúr kreppunni. Þetta verkefni býður uppá samstarf við skóla og atvinnulífið.

15. Athafnasmiðju í Reykjavík fyrir alla aldurshópa. – Þetta er úrræði sem lengi hefur verið kallað eftir meðal atvinnuleitenda. Slíkur staður getur gefið atvinnuleitendum virkni, fastan punkt í tilveruna og stökkpall til að framleiða sínar eigin vörur. Þetta er góð forvörn fyrir atvinnuleitendur svo þeir endi ekki sem öryrkjar.

Atvinnuleitandi, já - En fullorðin manneskja, ?

Sárlasinn heima.

Hringdi í Vinnumálastofnun til að láta vita að ég kæmist ekki í bókað viðtal á morgun.

Svar:

Þú mátt ekki vera lasinn á bótum, því ertu tekinn af bótum þar til þú lætur vita að þú sért orðinn frískur. Hefði ég bara sleppt því að mæta þá hefði ég misst bætur í 40 daga. Ég er því að græða helling.

NOT Ætli ég sé ekki frekar að missa mannréttindi?

Skömmu seinna barst sms. og svo stuttu síðar tölvupóstur (ath. hvorugu hægt að svara = noreply).

Sæll Sveinbjörn
Þú hefur verið bókaður í viðtal í ráðgjafadeild okkar að Engjateig 11, mánudaginn 6.des kl. 10. Skyldumæting, að öðrum kosti verður þú afskráður og mál þitt sent til greiðslustofu. Kveðja, ráðgjafar VMST

Nú er bara spurningin. Er þetta eðlilegur samskiptamáti. Bið ykkur að hafa í huga að ég er fullorðin manneskja.

Athafnasmiðjan

Stéttarfélög og Vinnumálastofnun hafa sett mikla fjármuni í það að bjóða atvinnuleitendum upp á frí námskeið af ýmsum toga, sem er gott mál. En nú er komið að næsta skrefi. Það þarf að skapa atvinnuleitendum vettvang til þess að nýta sína þekkingu og færni til að skapa verðmæti fyrir samfélagið.

Því höfum við nokkrir atvinnuleitendur sem störfum í hóp sem við nefnum Býflugurnar hafið undirbúning að stofnun Athafnasmiðju, þar sem atvinnuleitendur geta komið saman og unnið að sínum hugðarefnum, framleitt, skapað og gert við. Meiningin er að einstaklingar geti fundið sér farveg og jafnvel lífsviðurværi í svona smiðju. Komið gömlum hugmyndum og nýjum í framkvæmd.

Við höfum farið í hugmyndavinnu um verkefnið og erum að kanna með húsnæði og samstarfsaðila. Eins er verið að vinna að viðskiptaáætlun og setja niður á blað lög og reglur fyrir starfsemina.

Dæmi um hugmyndir:

Þróa og halda námskeið: Smíðanámskeið, margmiðlunarnámskeið, leiklistarnámskeið og endurvinnslunámskeið.
Aðstaða fyrir einyrkja, einstaklinga og hópa allskonar.
Aðstaða fyrir viðgerðir á heimilistækjum og aðstoð við viðgerðir á heimilistækjum.
Gagnræðurými (Skýring: herbergi/svæði þar sem hægt er að vera með gagnræður og þjóðfundarhugarflug).
Veita ráðgjöf út í samfélagið.
Leigja út einyrkjabása eða aðstöðu.
Hugmyndahópur/ ThinkTank hópur.
Mismunandi verkstæði, tré, málmur o. fl.
Leikfangaendurnýting og markaður.
Matreiðsla, td. tilraunaeldhús, nýta afurðir og útflutningur.
Framleiðsla á video og myndefni.
Nýting á uppsöfnuðum rekaviði.
Ýmiskonar smáframleiðsla.
Endurvinnsla/endurnýting.
Einingar fyrir kúluhús.
Föndur sem skapar verkefni.
Vefnaður úr íslenskun náttúruafurðum.
Vöruþróun.
Sauma- og prjónahorn.

Vilt þú vera með? Svarið er auðvitað já og því mætir þú á næsta kynningarfund hjá Býflugunum / Vinnum saman - Ný viðhorf, en þeir eru alla þriðjudaga kl. 14 í Rauðakrosshúsinu, Borgartúni 25.

Sjáumst!

Fundur ASÍ með fulltrúum atvinnuleitenda

Fimmtudaginn 4. nóvember fundaði Atvinnuleysi nei takk með framkvæmdastjóra ASÍ sem sæti á í stjórn Vinnumálastofnunar. Á fundinn mættu fyrir hönd Atvinnuleysis nei takk Björg Ólafsdóttir, Þórður Örn Guðmundsson, Sveinbjörn Fjölnir Pétursson og Þórhallur Árni
Ingason. Halldór Grönvold mætti fyrir hönd ASÍ.

Gögn sem lögð voru fram á fundinum:

• „Nokkrar ábendingar frá vinnufundi með atvinnuleitendum
• 5. maí 2010“
• „RÉTTINDI Á VINNUMARKAÐI – Umræðuskjal fyrir vinnu í málstofu um velferðar- og
• vinnumarkaðsmál (á ársfundi ASÍ 2010)
• „Ályktanir ársfundar ASÍ 2010“.

Fundurinn var haldinn til að fylgja eftir samráðsfundi ASÍ um málefni atvinnuleitenda frá 5. maí 2010.

Fyrri hluti fundarins fór í að ræða þjónustu Vinnumálastofnunar (VMST) við atvinnuleitendur. Þar komu fram marga áhugaverðar ábendingar um hvað betur má fara í þjónustu stofnunarinnar. Áhersla var lögð á mikilvægi þess að styðja við atvinnuleitendur og aðstoða þá í virkni, þ.m.t. að virða frumkvæði þeirra sjálfra það sem þeir eru að gera í eigin málum. Þá fá atvinnuleitendur stundum á tilfinninguna að verið sé að refsa þeim.

M.a. var bent á eftirfarandi:

- Erfitt er fyrir atvinnuleitendur að hafa samband við stofnunina t.d. þegar þeir eru boðaðir til
funda, en hafa ekki tök á að mæta, t.d. þar sem þeir eru í virkniúrræðum.
- Ekki er tekið tillit til áhugasviða og væntinga atvinnuleitenda við ákvörðun um virkniúrræði
og í samskiptum við þá almennt. Í því sambandi var m.a. bent á reglur sem nú gilda um val á
námskeiðum í ÞOR verkefninu.
-Stofnunin hefur ekki þekkst boð um aðstoð/samstarf við atvinnuleitendur.
- Ekki er nægilega vel staðið að því að upplýsa atvinnuleitendur um réttindi þeirra og sérkjör
sem þeim bjóðast, t.d. varðandi heilbrigðisþjónustu.
- Takmörk eru fyrir því hvað atvinnuleitendum stendur til boða mörg námskeið, þeim að
kostnaðarlausu.

Í þessu sambandi var rætt um aðkomu atvinnuleitenda að starfi Vinnumálastofnunar og kom m.a. fram að atvinnuleitendur hefðu óskað eftir aðkomu að stjórn VMST.

Þá var rætt um upplýsingamiðlun til atvinnuleitenda, bæði á vefnum og í rituðu formi. M.a. kom fram að nú er kominn í loftið upplýsingavefur fyrir atvinnuleitendur www.betritid.is.

Á seinni hluta fundarins fór Halldór yfir eftirfylgni ASÍ í framhaldi af vinnufundinum í maí. Hann
gerði grein fyrir minnisblaðinu sem hann lagði fram vegna vinnu við endurskoðun laganna um atvinnuleysistryggingar, sem byggir á niðurstöðum vinnufundarins. Hann gerði jafnframt grein
fyrir stöðunni varðandi endurskoðunarvinnuna. Fram kom m.a. að fyrir liggur að bótatímabilið verður lengt. Þá greindi hann frá álitaefnum sem komið hafa upp í umræðunni, m.a. vegna tillagna ASÍ, sem nú eru til frekari skoðunar í ráðuneytinu. Þá greindi Halldór frá niðurstöðum ársfundar ASÍ varðandi málefni atvinnuleitenda. Þar kom m.a. fram krafa varðandi vinnumarkaðsaðgerðir og atvinnuleysisbætur og upphæð þeirra, sem væntanlega verður tekin upp við stjórnvöld í tengslum við kjarasamningaviðræðurnar sem nú eru að hefjast. Þá var einnig rætt um ábendingar um að sett verði fram „lágmarkstekjuviðmið“. Loks benti hann á að hugmyndin um „Umboðsmann atvinnuleitenda/styrkþega“ hefði ekki fengið eitt einasta atkvæði í umfjölluninni í vinnuhópum á ársfundi ASÍ.

Þá sögðu fulltrúar atvinnuleitenda frá verkefninu „Athafnasmiðjan“ og óskuðu eftir stuðningi og beinni aðstoð ASÍ/verkalýðsfélaganna við verkefnið.

Halldór lagði eftirfarandi til í lok fundarins:

1. Efnt verði til formlegs fundar Vinnumálastofnunar með atvinnuleitendum. Á þann fund verði boðaðir formaður stjórnar Vinnumálastofnunar, fulltrúar úr stjórn, lykilstarfsmenn VMST og fulltrúar atvinnuleitenda. Markmið fundarins verði að fjalla um athugasemdir og ábendingar atvinnuleitenda varðandi vinnumiðlun og framkvæmd laga um vinnumarkaðsaðgerðir og atvinnuleysistrygginga. Þá verði fjallað um mögulega aðkomu atvinnuleitenda að starfi VMST með formlegum hætti, s.s. með stofnun notendahóps/notendaráðs atvinnuleitenda. Fundurinn verði undirbúinn með því að fulltrúar atvinnuleitenda setji fram ábendingar sínar og athugasemdir með skriflegum hætti. Halldór/ASÍ mun vinna að því að koma slíkum fundi á.

2. Skoðuð verði nánar upplýsingamiðlun til atvinnuleitenda og möguleg aðstoð ASÍ að því máli. Í því sambandi var rætt um að skoða frekar vefinn www.betritid.is og hvernig megi styðja hann og styrkja, fjárhagslega og starfslega.

3. Halldór mun skoða hvort og þá með hvaða hætti ASÍ og aðildarfélög þess geta stutt við Athafnasmiðjuna, bæði beint og óbeint. Jafnframt var bent á að rétt væri að leita til sveitarfélaganna og Vinnumálastofnunar.

4. Halldór mun gera fulltrúum atvinnuleitenda grein fyrir framgangi mála varðandi endurskoðun laganna um atvinnuleysistryggingar.

5. Halldór mun senda þátttakendum á fundinum gögn varðandi vinnu á Evrópuvísu um lágmarkstekjuviðmið og gögn frá Hagstofu Íslands um lágtekjumörk og tekjudreifingu 2004 - 2009 á Íslandi og annars staðar í Evrópu.

Punkta ritaði Halldór Grönvold.

Þeir atvinnuleitendur sem vilja, koma að vinnu við undirbúning á fundi með ASÍ og Vinnumálastofnun og sitja þann fund gefi sig fram með því að senda póst á netfangið: stjornlagathingmadur@gmail.com.

Forvarnir vantar

Ég pantaði í sumar viðtal hjá velferðarsviði Reykjavíkurborgar. Mætti þar og sagðist nú vera búinn með 2/3 af mínum rétti til atvinnuleysisbóta. Þar sem ég væri nú skipulagður maður og hugsaði fram í tímann langaði mig til að vita hvað Borgin ætlaði að gera fyrir mig ef ég væri ekki kominn með fastar tekjur eftir eitt ár.

Þar komst ég að því að það er alveg sjálfsagt að veita þér aðstoð en eingöngu ef þú ert kominn í ræsið, eignalaus og helst skilinn við konuna því annars skerðum við þínar bætur með hennar tekjum, krónu á móti krónu.

Semsagt alveg sjálfsagt að taka þig upp úr ræsinu með kíttispaða. Mér varð á að spyrja hvað ætlið þið að gera í forvörnum þar sem vitað er að þúsundir einstaklinga munu lenda á sveitarfélögunum á næstu mánuðum. Starfsmaðurinn skildi ekki spurninguna, vitnaði bara í reglugerðir og skerðingar.

Skelfileg tilhugsun.

Stofnun í fóstur

Öll þekkjum við það að hægt er að taka geit, hænsni og jafnvel fjöru eða landsskika í fóstur. Hvernig væri að taka t.d. Vinnumálastofnun og/eða Tryggingastofnun í fóstur? Kannski verða þær að einni stofnun fljótlega, hver veit?

Við hin atvinnulausu mættum á staðinn og tækjum utan um starfsmenn. Nú mátt þú fara heim og hvíla þig, því þú ert búinn að vera undir miklu álagi undanfarna mánuði. Ég skal svara í símann og ræða við þá atvinnuleitendur eða bótaþega sem koma hingað. Svo getum við bakað vöflur, sungið og verið með skemmtiatriði. Sköpum nýjann móral í stofnununum og léttum andrúmsloftið.